काठमाडौं । भारतका चर्चित गायक केके उर्फ कृष्ण कुमार कुन्नथको हृदयघातका कारण निधन भएको छ । कोलकातामा एक कन्सर्ट गरे लगत्तै अचानक अस्वस्थ भएपछि उनी ढलेका थिए । नजिकैको अस्पताल पुर्याउँदा चिकित्सकले केकेलाई मृत घोषणा गरेका थिए ।
५३ वर्षिय गायक केकेको हृदयघातका कारण मृत्यु भएको भारतीय संचारमाध्यमले जनाएका छन् । यद्यपी यसबारे पोष्टमार्टमपछि बल्ल स्पष्ट हुनेछ । ९० को दशकमा बलिउडमा राज गरेका केकेले हजारौं गीत गाएका थिए । यस्तै उनी थुप्रै पुरस्कारबाट सम्मानित पनि भएका थिए ।
उनी दक्षिण भारतीय गायनमा पनि लोकप्रिय थिए । तडप तडपके इस दिल से आह निकलती रही, खुदा जाने, इट्स द टाइम टू डिस्को, और कोही कहे कहता रहे जस्ता दर्जनौ गीतका कारण केके लोकप्रियताको शिखरमा पुगेका थिए ।
के के यस्ता स्टार थिए जसका गीत कहिले पुरानो हुँदैनन् भनिन्छ । उनको निधनमा बलिउड शोकमा डुबेको छ ।